فروردین آیینین 19-دان بری ایشه باشلامیش تورکجه کیتابلار سرگیسی شهرداشلاریمیز وریندن گؤزله نیلمز حالدا قارشیلاندی(استیقبال اولوندو).سرگینین قورولودوغو یئر مساحت باخیمیندان چوخ بؤیوک اولماسادا،گؤسته ریلن کیتابلارین باشلیقلاری(عنوان)،آذربایجانیمیزین دیل،تاریخ،ادبیات هابئله اوشاقلارا عایید تورکجه ناغیللارین قونو چئشیتلیگی(تنوع موضوعات) ایلگی چکیجی(جالب توجه) اولموشدور.بو اوزدن سرگینی اؤزه ل اولاراق آذربایجانا و دیلیمیزده وار اولان تورکجه کیتابلارا اوداقلاندیغی اوچون بؤیوک آدلاندیرماق اولار.

 شهریمیزده یاشایان و یانی سیرا عؤمور بویو بیر سطر تورکجه یازی گؤرمه ین جاوانلار و اوشاقلار،تورکجه نین یازیلی دیل اولما اولاناغی و چیخارینا اینانمادیقلاری حالدا بیردن-بیره بئیینلرینده کی حیصار سینیر و سانکی ایندیه دک باشقا بیر دونیادا یاشاییرمیشلار،کیتابلاری گؤرونجه ایستر-ایسته مز سئوینیردیلر.بونلارین هامیسینا اورتاق(مشترک) بیر سوال یارانیردی:تورکجه نی اوخویانمیرام ایندی من نئیله‌مه لی‌یم؟هئچ بیلمزدیم تورکجه‌نی یازماق اولار،بونلاری کیم یازمیش دئییرکن،درین بیر فیکره دالیردیلار...!!!

بو سوال ایله اوزله‌شن شهرداشلاریمیزین بیرچوخو مهندس محمد صادق نایبی‌نین (1)"آموزش گرامر زبان تورکی آذربایجانی در یک ترم" باشلیقلی کیتابینی گؤردوکده ممنونییتله آلیرلار.اوشاقلار بؤلومونده‌کی کیتابلار دا عاییله‌لرین دیققتلی باخیشینی اؤزونه چکیر.سانیرام اوشاقلاری ایله بیرلیکده سرگیدن گؤروش آپاران عاییله‌لرین هئچ بیریسی بو بؤلومدن الی بوش قاییتماییبلار.

بیلدیینیز کیمی اوزاق کئچمیشدن گونوموزه دک سورن مسموم ذهنییتلر،باخیشلار و دوشونجه‌لر تورکجه کیتاب ساتیلماٰ،یاییلما بیرده‌ اوخوماسینی پانتورکیزم‌له برابر بیلیرلر.همن بو مسموم بئیینلرین یوزده دوخسان دوققوزو پان کلمه سینین آنلامینی دوشونمه‌دن بیلمه دن اونو قوردچولوق،بؤلوجولوک و ساده سؤزله دئسک ایشلریندن باش تاپیلماسی چتین،گیزه‌ملی هابئله تهلوکه‌لی(‌خطرناک) آداملار تصور ائدیرلر.من بوردا بو سورونلارین یارانما ندنینی(علت) یانیتلاماق نییتینده دئییلم، آنجاق سرگی ایشه باشلادیغی گوندن بری صوبدن-گئجه‌یه کیمی صادقانه زحمت چکنلر بللی قوروملار طرفیندن پانتورکیزم سؤیله‌مینی یایماغا سوچلانیرلار.هر گون بو اینسانلارا هده-قورخو مئساژی گؤنده‌ریلیر.اونلارین دئیشینه گؤره میز آلتیندان یاسادیشی(غیرقانونی)کیتابلار آل-وئر اولونور،بابکین هئیکلی گیزلیجه ساتیلیر.قالسین‌کی بابک قالاسی پوسترینی دووارا یاپیشدیرماق تک باشینا باغیشلانماز سوچدور،قوپوزون سسی غیر مجازدیر!

بیلمیرم!!!

 بلکه اونلارا گؤره بو گئنیشلیکده دونیانی آذربایجانلیلارین دیلی،موسیقی‌سی،غورورلو تاریخی،شرفلی قهرمانلاری دار ائدیبدیر.بلکه تورکجه یازیلاری اوخویانمیرام دئین سئویملی شهرداشلاریمین اینسانی حاقلاری "تورک دیلینده مدرسه " بو گونلر آرتیق احساس اولونور.

1.مهندس نایبی میانالی تانینمیش یازاردیر.آقای نایبی‌ دن "مفاخر و مشاهیر میانه"/"هزار کلمه اصیل تورکی در زبان فارسی"/"نصاب صادق"/آموزش گرامر زبان تورکی در یک ترم" کیتابلاری ایشیق اوزو گؤرموشدور.

قوتادغوبیلیک کیتابینا آچیقلامالار کیتابی دا گلن آیلاردا چاپ اولوناجاق.